काठमाडौं, १५ साउन २०७८ ।

भूकम्पले क्षतिग्रस्त वसन्तपुर दरबार क्षेत्रमा अवस्थित उपत्यकाको मुख्य सम्पदा काष्ठमण्डपभित्र गजुर भित्र्याइएको छ । कुमारी घरसँगै रहेको पुरानो देवताघरमा तीन दिनसम्म पूजा गरेर बिहीबार काष्ठमण्डभित्र गजुर भित्र्याइएको हो । अब साइत हेरेर काष्ठमण्डपको छानामा गजुर राखिने छ ।

काष्ठमण्डप पुनर्निर्माण समितिका सचिव गौत्तम डंगोलले पुनर्निर्माण सकिन अझै तीन महिना लाग्ने बताए । ‘विधिपूर्वक गजुर भित्र्याइएको छ, यसलाई साइत हेरेर छानामा राखिनेछ, योसहित अन्य काम सक्न अझै ३ महिना लाग्छ,’ उनले भने । उनका अनुसार हालसम्म ९० प्रतिशत काम सकिएको छ । अब छानो छाउने काम मात्रै बाँकी छ । काष्ठमण्डपको छानामा झिगटी प्रयोग गरिनेछ भने अन्य ठाउँमा काठैकाठ प्रयोग हुनेछ पुनर्निर्माणमा हालसम्म १० करोड रूपैयाँ खर्च भएको छ भने अझै २ करोड रकम खर्च हुने अनुमान गरिएको छ ।