नेकपा (एकीकृत समाजवादी) पार्टी काठमाडाैं क्षेत्र नं. १० का संयाेजक युवा नेता बटुकृष्ण थापाले आवाज विहिनहरूकाे आवाज र भराेसा बिहीनहरूका लागि भराेसायाेग्य साथि नेकपा (एस) पार्टी भएकाे बताउनुभयाे ।

नेपाल कम्युनिष्ट पार्टी (एकीकृत समाजवादी) काे कीर्तिपुर नगर कमिटीकाे कार्यालय उद्घाटन तथा पार्टी कार्यालयकाे साइनबाेर्ड राख्ने कार्यक्रममा उहाँले यस्ताे भन्नुभएकाे हाे ।

‘नयाँ जाेश, नयाँ उर्जा र नयाँ उद्देश्य बाेकेर नयाँ कार्यक्रमका साथ अघि बढ्न याे पार्टी कार्यालयले धेरै नै मद्दत पुर्‍याउनेछ ।’, युवा नेता थापाले भन्नुभयाे, ‘कीर्तिपुरकाे कम्युनिष्ट आन्दाेलनलाई जाेगाउन विभिन्न अवसरलाई त्यागेर नयाँ थिति, विधि र पद्दति स्थापित गराउन याे पार्टी कार्यालय स्थापना भएकाे छ।’

उपस्थित महानुभावहरूलाइ धन्यवाद दिनुहुँदै उहाँले असंवैधानिक ढंगबाट विधि, पद्दति र कम्युनिष्ट आचरणलाई तहस नहस पार्न तत्वहरूसँग सुरूवातकाे दिनमा पार्टी भित्र नै बसेर संघर्ष गरेकाे बताउनुभयाे ।

‘पार्टी भित्र धेरै पटक बैठक, आलाेचना एवं आत्मालाेचना गरिरहँदा केही पार नलागेर कम्युनिष्ट आन्दाेलनलाइ जाेगाउन विद्राेहकाे नतिजा स्वरूप याे पार्टीकाे जन्म भएकाे हाे ।’, उहाँले बताउनुभयाे ।

अत्याधिक युवाहरूकाे साथ र सहयाेग रहेकाे नेकपा (एकीकृत समाजवादी)लाइ कीर्तिपुरकाे सबैभन्दा शक्तिशाली, सुव्यवस्थित एवं उत्कृष्ट पार्टीकाे रूपमा स्थापित गराउने उहाँले प्रतिवद्धता जनाउनुभयाे ।

कार्यक्रममा कीर्तिपुर नगर संयोजक बद्री बुढाथोकि, सचिव रोहित महर्जन, युवासंघ नगर अध्यक्ष साजन श्रेष्ठ केदार बुढाथोकि, चन्दागिरी नगरपालिकाका अध्यक्ष भाइकृष्ण बलामी लगायतका उपस्थिति थियाे ।