कवि तथा कथाकार उपेन्द्र सुब्बाले ‘कबड्डी’ शृङ्खलाबाट चलचित्र लेखनमा प्रवेश गरेपछि अब ‘जारी’को सफलतापछि ‘जारी २ : सङ अफ च्याब्रुङ’ लिएर आएका छन् । लिम्बू समुदायको संस्कृति र कथामा आधारित यो फिल्म आगामी कात्तिक २१ गते प्रदर्शन हुने तयारीमा छ ।

पहिलो ‘जारी’ हिट भएपछि सुब्बाले श्रृङ्खला अघि नबढाउने बताएका थिए, तर च्याब्रुङ गीतको कथा आएको कारण उनले आफ्नो अडान बदले । “मैले श्रृङ्खला अगाडि नबढाउने सोच राखेको थिएँ, तर च्याब्रुङको कथा आएपछि निरन्तरता दिनैपरेको महसुस भयो,” निर्देशक सुब्बाले भने ।

‘जारी २’ मा उही समाज र पात्रहरू छन्, तर सात वर्षपछि उनीहरूका जीवनका परिवर्तनहरू देखाइनेछन् । विजय बराल, दयाहाङ राई, मिरुना मगर, ऋचा शर्मा, पुष्कर गुरुङलगायत कलाकारले अभिनय गरेका छन् ।

सुब्बाका अनुसार, फिल्ममा कुनै व्यावसायिक दबाब राखिएको छैन । “पहिलो भागको सफलताले होइन, सिर्जनाको भावनाले चलचित्र बनाएको छु । मेहनतले नै सफलता दिलाउँछ भन्नेमा विश्वास गर्छु,” उनले बताए ।

साहित्य र चलचित्र दुवै क्षेत्रमा सक्रिय सुब्बाले चलचित्रमा साहित्यको गहिराइ अझ बढाउनुपर्ने धारणा पनि व्यक्त गरेका छन् ।