प्रत्येक १०/१० वर्षमा गरिने राष्ट्रिय जनगणना यसवर्ष १२ औं पटक गर्न लागिरहेको छ । यस पटक “मेरो गणना मेरो सहभागिता” भन्ने मूल नारा तय गरेको छ ।

गत जेठ महिना मै सम्पन्न गर्नु पर्ने भए तापनि कोभिडका कारण यस पटकको जनगणना केही महिना पछि मात्र हुन लागेको छ ।

यद्दपि जनगणनाका लागि घर सूचीकृत गर्ने कार्य भने सम्पन्न भैसकेको छ । जनगणनाको मुख्य काम गणकहरूले प्रत्येक घरमा गई आवश्यक तथ्याङ्ग लिने हो ।

सोही कामका लागि कीर्तिपुरमा गणकहरूलाई कार्तिक १३ गतेदेखि तालिम सञ्चालन गरेको छ । कार्तिक १६ गतेसम्म सञ्चालन हुने यस गणक तालिम कीर्तिपुर माध्यमिक विद्यालयमा १२ भन्दा बढी प्रशिक्षकहरूले तालिम दिइरहनुभएको छ ।

यस तालिमपश्चात यही कार्तिक २५ गते देखि मंसिर ९ गतेसम्म गणकहरू घरघरमा गई तथ्याङ्क सङ्कलन गर्ने हो । कीर्तिपुरमा रहेको जनगणना कार्यालयले कीर्तिपुर नगरपालिकाका साथै छिमेकी नगरपालिका दक्षिणकाली नगरपालिकाको पनि तथ्याङ्क सङ्कलन गर्ने हो ।

गणकहरूले सोध्ने मुख्य प्रश्नमा कीर्तिपुर नगरपालिकामा कीर्तिपुर नगरपालिकाले थप केही प्रश्नहरू समावेश गराएर आवश्यक तथ्याङ्क सङ्कलन लिने तयारी गरे तापनि हाल त्यो सम्भव नभएको जनाएको छ ।

फिल्डमा खटिने गणकहरूलाई रिता आचार्य, विवेक पन्त, जुजुभाइ महर्जन, उमेशराम खत्री, राजेश श्रेष्ठ, लिलाधर अधिकारी, अंशु मानन्धर, शिवराम चालिसे, जीवन थापा, नन्दकुमार थारु, जेनिस महर्जन र तथ्याङ्क विभागका प्रतिनिधिहरूले सहजीकरण गरिरहनुभइको छ ।

यस राष्ट्रिय जनगणनामा दक्षिणाकाली नगरपालिकामा ३२ जना र कीर्तिपुर नगरपालिकामा ११० जना गणकहरू रहेका छन् भने सुपरीवेक्षकहरू क्रमश ९ र २९ जना रहेका छन् ।