काठमाडाैं महानगरपालिका मेयर विद्यासुन्दर शाक्यले मंगलबार शिवरात्रीको अवसर पारेर सिद्धेश्वर महादेव मन्दिर उद्घाटन गर्नुभएको हो । काठमाडौँ महानगरपालिका वडा ३ धारापाटीमा रहेको उक्त मन्दिर महानगरको जनसहभागितामा आधारित कार्यक्रमअन्तर्गत निर्माण गरिएको हाे ।

‘विकासका परिणामहरु विस्तारै आउँछन् । हामीले गरेका कामहरु धमाधम सकिँदैछन् । कतिपय कामहरु सम्पन्न हुने चरणमा छन् । यो प्रगतिलाई मैले सकारात्मक मानेको छु’, मेयर शाक्यले भन्नुभयाे, ‘सम्पदा पुननिर्माणको प्रगतिमा क्रमशः सुधार हुँदै गएको बताउनुभयो।’

स्थानीय तह गठन भएपछि पहिलो कार्यकाल भएकोले स्थानीय सरकारको स्वरुप बनाउन कानून र अन्य प्रबन्धमा काम गर्नुपर्ने बताउँदै सुरुदेखि नै सेवा प्रवाहका लागि सुविधा सम्पन्न पूर्वाधार र सम्पदा पुननिर्माणमा प्राथमिकता दिने नीति लिएकाे उहाँले बताउनुभयाे ।

कार्यक्रममा वडा ३ का अध्यक्ष दीपक के. सी. ले शैक्षिक, धार्मिक र स्वास्थ्य क्षेत्र वडा ३ को विशेषता बताउँदै उहाँले भन्नुभयाे, ‘यो विशेषतालाई जोगाउने कामलाई महत्व दिएर हामीले काम गरिरहेका छौँ । २ सय रोपनी जग्गा संरक्षण गरेर पार्क बनाएका छौँ । ८ किलोमिटर सडक विस्तार गरेका छौँ । भैरव, नारायण, शिव, दक्षिणकाली र गणेश मन्दिर निर्माण, पुननिर्माण र मर्मत सम्भार गरेका छौँ ।’

त्यस अवसरमा सहभागी स्थानीयले महानगरले अघि सारेका योजनाबाट स्थानीयबासी लाभान्वित भएको प्रतिक्रिया दिएका थिए ।

धारापाटी क्षेत्रमा साढे ३ रोपनी जग्गा संरक्षण गरेर पार्क निर्माण गरिदैछ । यही जग्गामा करिब २१ लाख ९४ हजार रुपैयाँ लागतमा मन्दिर निर्माण गरिएको हो ।

मन्दिर बनाउन धारापाटी सामाजिक सेवा समितिले संयोजन गरेको थियो ।