काठमाडौँ, २० असार: राष्ट्रिय स्वतन्त्र पार्टी (रास्वपा) का तर्फबाट सङ्घीय सरकारमा सहभागी मन्त्रीहरूले तत्काल राजीनामा नदिने निर्णय गरेका छन्। प्रधानमन्त्री पुष्पकमल दाहाल ‘प्रचण्ड’सँगको छलफलपछि उहाँहरूले केही समयका लागि राजीनामा स्थगन गर्ने निर्णय गरेका हुन्।

प्रधानमन्त्री निवास बालुवाटारमा आज भेटघाटमा पुगेका रास्वपाका मन्त्रीहरूले प्रधानमन्त्रीसँगको छलफलपछि उहाँलाई साथ दिने निर्णयमा पुगेको रास्वपाको संसदीय दलका प्रमुख सचेतक सन्तोष परियारले जानकारी दिए।

प्रधानमन्त्रीले संवैधानिक अधिकार प्रयोग गर्दै संसद् फेस गर्ने बताएकाले, उहाँको संवैधानिक अधिकारको सम्मान गर्दै राजीनामा स्थगन गरेको परियारले बताए। रास्वपाका मन्त्रीहरूले चाँडोभन्दा चाँडो संसदको फेस गर्न प्रधानमन्त्रीलाई आग्रह गरेका छन्।

वर्तमान सरकारमा रास्वपाका सभापति रवि लामिछाने उपप्रधानमन्त्री तथा गृहमन्त्री, उपसभापति डोलप्रसाद अर्याल श्रम, रोजगार तथा सामाजिक सुरक्षामन्त्री, विराजभक्त श्रेष्ठ युवा तथा खेलकुदमन्त्री, र सुमना श्रेष्ठ शिक्षा, विज्ञान तथा प्रविधिमन्त्री रहेका छन्।