काठमाडौँ, १९ भदौ : नेकपा (एमाले) ले नेपाली काङ्ग्रेससँग भएको संविधान संशोधनसम्बन्धी सहमति कार्यान्वयन गर्दै अघि बढाउने निर्णय गरेको छ। च्यासलस्थित पार्टी केन्द्रीय कार्यालयमा मङ्गलवारदेखि सुरु भएको पोलिटब्युरो बैठकपछि सञ्चारकर्मीसँग कुरा गर्दै प्रचार तथा प्रकाशन विभाग प्रमुख राजेन्द्रप्रसाद गौतमले यो कुरा स्पष्ट पारे।

गौतमका अनुसार, संविधान पुनरावलोकन गरेर आवश्यक स्थानमा संशोधन गर्ने र यसमा काँग्रेससँगको सहमति कार्यान्वयन गर्ने विषयमा एमालेले आफ्नो प्रतिबद्धता जनाएको छ। साथै, काँग्रेस-एमालेबीच भएको सात बुँदे सहमति अनुरूप सरकारलाई निरन्तरता दिँदै मुलुकको आर्थिक अवस्थालाई सुधार्ने प्रयासमा सरकार सफल हुने विश्वास व्यक्त गरिएको छ।

पार्टी महासचिव शङ्कर पोखरेलले बैठकमा एमालेलाई अझ बलियो र निर्णायक राष्ट्रिय शक्ति बनाउन आवश्यक रहेकोमा जोड दिए।

एमालेले संविधान संशोधनका लागि काँग्रेससँगको सहकार्यलाई अघि बढाउँदै मुलुकको स्थायित्व, स्थिरता, र आर्थिक सुधारका लागि यो सहमतिलाई कार्यान्वयनमा ल्याउने निर्णय गरेको छ।