काठमाडौँ, १९ भदौ : पेरिस पारा ओलम्पिक २०२४ मा नेपाललाई पहिलो ऐतिहासिक कास्य पदक जिताउने खेलाडी पलेशा गोवर्धनलाई प्रधानमन्त्री केपी शर्मा ओलीले सम्मान गर्दै सरकारबाट करमुक्त ६५ लाख रुपैयाँको पुरस्कार घोषणा गर्नुभएको छ। बालुवाटारस्थित प्रधानमन्त्री निवासमा आयोजित बधाई तथा सम्मान कार्यक्रममा प्रधानमन्त्री ओलीले पलेशाको यो जीत नेपाली खेल क्षेत्रका लागि ऐतिहासिक भएको बताउँदै यो कीर्तिमानले नेपालको इज्जत बढाएको उल्लेख गर्नुभयो।

पलेशाले पेरिस पारा ओलम्पिकको के–४४ वर्गअन्तर्गत महिला ५७ किलो तौल समूहमा प्रतिस्पर्धा गर्दै सर्वियाकी मारिजा मिचेभलाई १५–८ ले पराजित गर्दै नेपाललाई पहिलो पटक पारा ओलम्पिकमा पदक जिताएकी हुन्। प्रधानमन्त्री ओलीले यो सफलता नेपाली खेलाडीको मेहनत र साहसको परिणाम भएको र भविष्यमा अझ ठूला कीर्तिमानहरू बनाउने प्रेरणा भएको बताउनुभयो।

यस अवसरमा पलेशाका प्रशिक्षक, व्यवस्थापक र अन्य सहभागी खेलाडीलाई पनि सम्मान गरिएको थियो।