भक्तपुर : राष्ट्रिय स्वतन्त्र पार्टी (रास्वपा) भक्तपुर जिल्ला समितिले आज आफ्नो पहिलो ऐतिहासिक जिल्ला भेला र खुल्ला सभा आयोजना गर्दैछ। भ्रष्टाचार, कुशासन, र बेथितिको विरुद्ध एकजुट भई सुशासनको स्थापनाका लागि आयोजित यो कार्यक्रम बिहान ७ बजे शंखधर चोक, मध्यपुर थिमिबाट सुरु हुने तयारी भएको छ।

खुल्ला सभामा सहभागीहरू सांस्कृतिक झाँकीसहित दुईपोखरी (निगु पुखु) पुग्नेछन्, जहाँ बिहान ८ बजे सभा आयोजना हुनेछ। सभामा पार्टीका प्रमुख नेताहरूले सम्बोधन गर्ने कार्यक्रम छ।

सभालाई केन्द्रिय उपसभापति तथा सांसद डी.पी. अर्याल, सचिवालय सदस्य तथा प्रमुख सचेतक सन्तोष परियार, पार्टी सचिवालय सदस्य एवं पूर्व युवा तथा खेलकुद मन्त्री बिराजभक्त श्रेष्ठ, र केन्द्रिय सदस्य तथा सांसद सोबिता गौतमले सम्बोधन गर्नेछन्।

पार्टीका अनुसार, यो सभा र भेला राष्ट्रिय स्वतन्त्र पार्टीका सभापति रवि लामिछानेविरुद्ध भइरहेको योजनाबद्ध राजनीतिक प्रतिशोधको विरोधमा आयोजित अभियानको हिस्सा हो। साथै, यस कार्यक्रमले जिल्लामा पार्टीको सांगठनिक उपस्थिति बलियो बनाउने उद्देश्य राखेको छ।

भक्तपुर जिल्लाभरका अग्रगामी, न्यायप्रेमी, र सुशासन चाहने जनसमुदायलाई कार्यक्रममा सहभागी हुन आव्हान गरिएको छ। पार्टीका शुभचिन्तकहरू, नेता, र कार्यकर्ताको बाक्लो उपस्थिति रहने अपेक्षा गरिएको छ।