काठमाडौं, असार १३ । काठमाडौं उपत्यकामा जारी निषेधाज्ञाको विषयलाई लिएर उपत्यकाका तीन जिल्लाका प्रमुख जिल्ला अधिकारीहरुको बैठक आज बस्दै छ । दिउँसो बस्ने बैठकले जारी निषेधाज्ञाको बारेमा मोडालिटी कस्तो बनाउने भन्ने विषयमा निर्णय गर्नेछ ।

जारी निषेधाज्ञा लाई एक हप्ता थप हुने गरि र अन्य केही क्षेत्र खुकुलो बनाइने जिल्ला प्रशासन कार्यालय ललितपुरका प्रमुख जिल्ला अधिकारी ढुण्डीप्रसाद निरौलाले जानकारी दिनुभयो । सार्वजनिक यातायात सञ्चालन गर्न दिने माग आएको भएता पनि अहिलेको संक्रमणको अवस्था र संभावित खतरालाई मध्यनजर गरि खोल्ने अवस्थामा आफूहरु नपुगेको र यस विषयमा पनि आज निर्णय हुने प्रजिअ निरौलाले बताउनुभयो ।

अरु के– के क्षेत्र थप खुकुलो हुने तथा भैरहेको मोडालिटीलाई कसरी अगाडी बढाउने भन्ने प्रश्नमा अहिले खुला भएका क्षेत्रहरुको खोल्ने र बन्द गर्ने समयतालिका हेरफेर हुन्छ र अन्य थप खुला हुने क्षेत्रलाई समय मिलाएर खोल्न दिने जानकारी उहाँले दिनुभयो । पटक पटक थप गरि बैशाख १६ देखि लागु गरिदै आएको निषेधाज्ञाको पछिल्लो पटक थप गरिएको अवधि उपत्यकामा भोलि सोमबार राती १२ पछि सकिँदैछ ।