काठमाडौँ, असार २२ । गत जेठ २५ देखि २९ गतेसम्म भेरोसेल खोपको पहिला मात्र लगाएका ज्येष्ठ नागरिकहरुलाई आज बाट तीन दिनसम्म दोश्रो मात्राको खोप लगाइदिदै छ । त्यसअघि पनि भेरो सेलको पहिलो मात्रा लगाएर तर विभिन्न कारणले छुट भएका व्यक्तिलाई पनि दोस्रो मात्रा दिइनेछ । सरकारले कोरोना भाइरसविरुद्धको ‘भेरो सेल’ खोपको दोस्रो मात्रा ज्येष्ठ नागरिकहरुलाई लक्षित गर्दै यो खोप अभियान थालिएको हो ।

स्वास्थ्य तथा जनसङ्ख्या मन्त्रालयले आजदेखि देशभरिका तीन हजार ९०० खोप केन्द्रबाट ६० देखि ६४ वर्ष उमेर समूहका ज्येष्ठ नागरिकलाई ‘भेरोसेल’ को दोस्रो मात्राको खोप लगाइरहेको छ ।

काठमाडौँ जिल्लामा ३२ सहित उपत्यकामा ४७ खोपकेन्द्र छन् । खोप बिहान १० देखि अपराह्न ४ बजेसम्म मन्त्रालयले तोकेको खोप केन्द्रबाट प्रदान गरिनेछ । स्वास्थ्य सेवा विभागका बालस्वास्थ्य तथा खोप शाखाका प्रमुख डा झलक शर्मा गौतमले करिब पाँच लाख जनालाई भेरोसेलको दोस्रो मात्राको खोप प्रदान गर्न थालिएको जानकारी दिनुभयो ।

खोप लगाउनका लागि पहिलो मात्रा लगाइएको कागज अनिवार्य देखाउनुपर्ने छ । नेपालमा अहिलेसम्म सात लाख ५९ हजार ९५४ ले दोस्रो र २६ लाख ११ हजार ८०७ जनाले पहिलो मात्राको खोप लगाइसकेका छन् । खोप अभियान आजदेखि यही असार २४ गतेसम्म सञ्चालन हुने छ ।