काठमाडौं, २० असार २०७८ । 

कोरोना (कोभिड–१९) नियन्त्रणका लागि काठमाडौं उपत्यकामा असार ३१ गते सम्मको लागि निषेधाज्ञा थप गरिएकाे छ ।

जारी निषेधाज्ञामा सार्वजनिक यातायात जोरबिजोर नियम हटाउँदै थप खुकुलो गरिएको छ।

असार ३१ गते सम्मको लागि थप गरिएकाे निषेधाज्ञा अवधिमा माइक्रो बस र टेम्पो चलाउन दिने निर्णय काठमाडौं उपत्यकाका तीन जिल्लाका प्रमुख जिल्ला अधिकारीहरुको बैठकले गरेकाे छ ।

अव थपिएको निषेधाज्ञामा माइक्रो बस र टेम्पो चलाउन पाउने छन् । लामो दूरीका सार्वजनिक यातायात भने जिल्ला प्रशासन कार्यालयको पास लिएर मात्र सञ्चालन गर्न पाउने छ ।

यातायात सञ्चालन गर्दा जनस्वास्थ्यका मापदण्ड अनिवार्य पालना गर्नुपर्ने छ । गाडी भित्र बस्दा यात्रुले मास्क, सेनिटाइजरको प्रयोग र सामाजिक दूरी कायम अनिवार्य गर्नुपर्ने छ ।

काठमाडौँ उपत्यकालगायत तराईका जिल्लाहरूमा पाँच सय र पहाडी जिल्लाहरूमा दुई सय सङ्क्रमित फेला परेमा निषेधाज्ञा जारी गर्न निर्देशन दिएको थियो ।

सरकारले कोभिड–१९ सङ्क्रमण महामारी रोकथाम तथा नियन्त्रण व्यवस्थापनका लागि वैशाख १६ बाट क्रमशः निषेधाज्ञा जारी गरिएको हो भने पछिल्लोपटक थप गरिएको निषेधाज्ञाको अवधि भोलि (सोमबार) राति १२ पछि सकिँदैछ ।