काठमाडौं: आगामी चार दिनसम्म देशभर अति भारीसम्म वर्षा हुने सम्भावना रहेको भन्दै मौसम विभागले सतर्कता अपनाउन सबैलाई अनुरोध गरेको छ। मनसुन पुनः सक्रिय भएकाले बाली भित्र्याउने समय भए पनि तत्काल खेतबारीमा काम नगर्न आग्रह गरिएको हो।

मौसमविद् रोजन लामिछानेका अनुसार, बंगालको खाडीबाट प्रवेश गरेको वायूले वर्षा गराउने संकेत देखिएकाले देशका अधिकांश भागमा भारी वर्षाको सम्भावना छ। “बिहीबार बेलुकादेखि शनिबारसम्म देशभर राम्रो पानी पर्ने सम्भावना छ,” उनले भने, “खासगरी बिहीबार रातिदेखि शनिबारसम्म धेरै ठाउँमा भारीदेखि अति भारी वर्षा हुन सक्छ। आइतबारबाट मात्रै सुधार हुने सम्भावना छ।”

बाढी र पहिरोको जोखिमसँगै कृषि क्षेत्रमा पनि यसले ठूलो असर पार्ने सम्भावना छ। लामिछानेले भने, “वर्षा अत्यधिक हुने सम्भावना भएकाले खेतमा जानुको साटो सतर्कता अपनाउनु उपयुक्त हुनेछ।”

यसैबीच, पश्चिम नेपालका कतिपय स्थानमा वर्षा सुरु भइसकेको छ। स्थानीय प्रशासनले पनि किसानलाई खेतमा नजान र धान भित्र्याउने काम नगर्न आग्रह गर्दै आएको छ। मौसमविद्हरुले अक्टोबरको दोस्रो सातासम्म मनसुन समाप्त हुने अनुमान गरे पनि वर्तमान परिस्थितिले त्यो सम्भावना कमजोर देखिएको छ।