मनसुन सकिएसँगै खुल्न थालेको मौसमसँगै हिमाली जिल्ला मनाङमा विदेशी पर्यटकको आगमन बढ्न थालेको छ ।
अन्नपूर्ण क्षेत्र संरक्षण आयोजना (एक्याप) एकाइ कार्यालयका अनुसार चालु यामको पहिलो डेढ महिनामै ७ हजार ४६१ पर्यटक मनाङ पुगेका छन् ।

एक्यापका संरक्षण शिक्षा सहायक भूपेन्द्र गुरुङका अनुसार इजरायलका १,१२७, जर्मनीका ५०१, बेलायतका ४६६ र अष्ट्रेलियाका ४४१ नागरिकले अन्नपूर्ण पदमार्ग, थोराङ्ला र लार्के भञ्ज्याङ हुँदै तिलिचो ताल भ्रमण गरेका हुन् । उहाँले भन्नुभयो, “विश्वका ८७ देशका नागरिक मनाङ आएका छन्, जसले स्थानीय र राष्ट्रिय अर्थतन्त्रमा सकारात्मक प्रभाव पार्ने अपेक्षा गरिएको छ ।”

पर्यटन व्यवसायी विनोद गुरुङका अनुसार जेनजी आन्दोलन र मनसुनका कारण अघिल्ला महिनामा पर्यटक घटेका थिए, तर अहिले फेरि चहलपहल बढ्दै गएको छ । “मनाङको आयस्तरले देशकै अर्थतन्त्रमा योगदान पुर्‍याउँछ,” उहाँले भन्नुभयो ।

होटल व्यवसायी नवीनविक्रम सिंहका अनुसार बुकिङ रद्द भएका होटलहरू अहिले पुनः भरिन थालेका छन् । “अझै पूर्ण रूपमा पर्यटक फर्किएका छैनन्, तर स्थिति सुधारोन्मुख छ,” उहाँले बताए ।

मनाङमा विदेशीसँगै स्वदेशी पर्यटकको आकर्षण पनि बढेको छ । स्थानीय पदमार्ग र ग्रामीण पर्यटनप्रति रुचि बढ्दै गएको व्यवसायीहरूको भनाइ छ ।
अन्नपूर्ण पदमार्गको प्रवेशद्वार लमजुङको बेँसीसहरबाट सुरु हुने यात्रा हाल सडक विस्तारसँगै अझ सहज बनेको छ ।