हेटौँडा, कात्तिक ३ गते । बागमती प्रदेश प्रमुख दीपकप्रसाद देवकोटाले उज्यालो पर्वले अन्धकार हटाई समृद्ध नेपाल निर्माणमा प्रेरणा दिने बताएका छन् ।

दीपावली, नेपाल सम्वत् ११४६, भाइटिका, म्हँ पूजा र छठ पर्वको अवसरमा जारी शुभकामना सन्देशमा उनले उज्यालो पर्वहरूले सभ्य, सुन्दर, शान्त र समृद्ध नेपाल निर्माणको दिशामा सबैलाई अघि बढ्न प्रेरित गर्ने उल्लेख गरेका छन् ।

प्रदेश प्रमुख देवकोटाले हालैका आन्दोलनका कारण देशमा उत्पन्न अनिश्चितताबीच राष्ट्रिय स्वार्थ, स्वाभिमान, एकता र सहअस्तित्वलाई सबैले प्राथमिकता दिनुपर्ने बताएका छन् । युवापुस्ताको भावना र आकाङ्क्षालाई सम्बोधन गर्दै राष्ट्रिय एकता सुदृढ गर्नुपर्ने उनको भनाइ छ ।

शुभकामना सन्देशमा उनले दीपावली र लक्ष्मीपूजालाई अन्धकारमाथि उज्यालो र निराशामाथि आशाको प्रतीकका रूपमा वर्णन गरेका छन् । नेपाल सम्वत् देशको गौरवपूर्ण इतिहास र सांस्कृतिक पहिचानको प्रतीक भएको उल्लेख गर्दै उनले राष्ट्रिय विभूति शंखधर साख्वाले स्थापना गरेको सम्वत्ले मौलिक गौरव झल्काउने बताएका छन् ।

सन्देशमा म्हँ पूजाले आत्मबोध र आत्मसाक्षात्कारको सन्देश दिने उल्लेख छ भने तिहार र भाइटिकाले पारिवारिक प्रेम र सम्बन्धलाई अझ सुदृढ बनाउने विश्वास व्यक्त गरिएको छ । साथै, छठ पर्व मानव र प्रकृतिबीचको सन्तुलन र सहजीवनको सन्देश बोकेको पर्व भएको उल्लेख गरिएको छ ।

प्रदेश प्रमुख देवकोटाले विविध संस्कृतिले भरिएको नेपालको सामाजिक एकता, सद्भाव र राष्ट्रिय पहिचानलाई चाडपर्वहरूले अझ बलियो बनाएको बताएका छन् ।