काठमाडौं :  साहित्यकार होमनाथ खत्री (होम दिम्माली)द्वारा रचित ‘आत्मिकी अन्धकार’ शीर्षकको कविता संग्रह कात्तिक १५ गते जुबु खप्तडी बस्नेत सेवा समाजले लोकार्पण गरेको छ। पुस्तकले भ्रष्टाचार, अराजकता, र असहिष्णुताजस्ता कुप्रवृत्तिहरूलाई प्रहार गर्ने उद्देश्य राखेको छ।

लोकार्पण कार्यक्रममा स्रष्टा खत्रीले समाजमा व्याप्त खराब प्रवृत्तिहरूलाई असल शिक्षा र आत्मिकी ज्ञानको अभावले प्रोत्साहन गरिरहेको बताउँदै, व्यक्ति, परिवार र राष्ट्रको सुधारका लागि सबैको मन शुद्ध हुनु जरुरी रहेको उल्लेख गरे।

लुम्बिनी प्रिन्टिङ सर्भिसले प्रकाशित गरेको यस कविता संग्रहलाई जेष्ठ नागरिक कमलबहादुर बस्नेत र नन्दकुमारी बस्नेतको बाहुलीबाट लोकार्पण गरिएको थियो। काठमाडौंको जरङ्खु हाईटमा समाजका अध्यक्ष गोपाल बस्नेतको अध्यक्षतामा आयोजित कार्यक्रममा गोरखापत्र संस्थानका कार्यकारी सम्पादक जुनारबाबु बस्नेतसहित विविध क्षेत्रका प्रतिष्ठित व्यक्तित्वहरूको सहभागिता थियो।