न्युयोर्क – संयुक्त राष्ट्रसङ्घको ७९औँ महासभामा सहभागी हुन न्युयोर्कमा रहेका प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच द्विपक्षीय भेटवार्ता सम्पन्न भएको छ। दुई देशका उच्च अधिकारीहरूको उपस्थितिमा टोते न्युयोर्क प्यालेस होटलमा भएको भेटलाई सकारात्मक मानिएको छ।

भेटपछि प्रधानमन्त्री ओलीले सञ्चारकर्मीहरूलाई संक्षिप्त प्रतिक्रिया दिँदै भेटवार्ता सौहार्दपूर्ण रहेको जानकारी दिए। परराष्ट्रमन्त्री डा. आरजु राणाले भारतीय प्रधानमन्त्री मोदीले चाँडै नेपाल भ्रमण गर्ने बताए।

भेटवार्तामा नेपाली पक्षबाट परराष्ट्रमन्त्री राणा, प्रधानमन्त्रीका मुख्य सल्लाहकार विष्णुप्रसाद रिमाल, विदेश सचिव सेवा लम्साल र अमेरिकाका लागि नेपाली राजदूत लोकबहादुर थापा सहभागी थिए भने भारतीय पक्षबाट विदेशमन्त्री एस जयशङ्कर र सचिव विक्रम मिश्रीलगायतको सहभागिता रहेको थियो।